Զուլալ Գազանճեան

Զուլալ Գազանճեան (10 Հոկտեմբեր 1936 կամ 1939^[1], Մուսա Լեռ, Հաթայ, Թուրքիա - 24 Փետրուար 2008 կամ 24 Փետրուար 2009^[1], Նիս), սփիւռքահայ բանաստեղծ։

Ծնած է Մուսալեռ։ Նախնական կրթութիւնը ստացած է Հալէպի մէջ։ Ապա 1949-ին մեկնած է Վենետիկ եւ ուսումը շարունակած՝ Ս. Ղազարի դպրեվանքը, Մխիթարեաններուն քով։ Գրել սկսած է դեռ աշակերտական տարիներէն։

1954-ին վերադարձած է Հալէպ եւ մինչեւ 1961 թուական ուսուցչական պաշտօն վարած՝ տեղւոյն ազգային վարժարաններուն մէջ։ 1961–էն՝ հաստատուած է Փարիզ։

Շարունակած է գրել։ Հրատարակած է «Կեանքը՝ Քոյրս» (1964), «Արեւածաղկի Մը Նման» (1975) քերթուածներու հատորները, «Շարունակելի» (1988, Վենետիկ), «Բանաստեղծութիւններ» (1996, Երեւան) եւ «Քերթուածներ» խորագիրով քերթուածներու հատորը (2008, Հալէպ)։

Աշխատակցած է գրական մամուլին, գրական-վերլուծական եւ բանասիրական յօդուածներով։

Տաժանելի հիւանդութեան պատճառաւ կը մեռնի 24 Փետրուար 2008-ին, Ֆրանսայի Նիս քաղաքին մէջ։

Վերջին տասնամեակին իր ժամանակը բաժնած է Փարիզի եւ Երեւանի միջեւ։ Հրատարակուած քերթողագիրքերն են.

1. «Կեանքը Քոյրս», Փարիզ 1964
2. «Արեւածաղկի մը Նման», Փարիզ 1975
3. «Շարունակելի», Վենետիկ 1992
4. «Բանաստեղծութիւններ», Երեւան 1996
5. «Հատընտիր Հայ Հին Բանաստեղծութեան», Վենետիկ 1998 երկու հատոր^[2]