Heesdörp (Bremervöör)

Heesdörp is en Dörp in de Gemeen Bremervöör, in’n Landkreis Rodenborg, Neddersassen.

Wapen/Flagg	Koort
Basisdaten
Bundsland: Neddersassen Landkreis: Rodenborg Gemeen: Bremervöör
Flach:	14,17 km²
Inwahners:	1.846 (31. Januar 2015)
Inwahnerdicht:	130,3 Inwahners pro km²
Postleettall:	27432
Vörwahl:	04761
Geograafsche Laag:	Koordinaten:53° 28′ N, 9° 12′ O53° 28′ N, 9° 12′ O

Heesdörp liggt op de Stoder Geest twüschen Pulvermöhlenbeek in’n Noorden un Hees in’n Süden. Na Süden to liggt dat Beverner Holt un na Noorden to dat Horner Holt.

De Naveröörd sünd Öölm in’n Noorden, Sprakel, Hemelingbossel un Eßel in’n Noordoosten, Byhusen in’n Süüdoosten, Bevern un Plönjeshusen in’n Süden un Bremervöör in’n Noordwesten.

Heesdörp kummt 1100 as Hesethorpe toeerst in de Oorkunnen vör, as Vaagt Gerung den Teegd an dat Doomkapittel in Bremen överdragen hett.

In’e Napoleoonschen Kriege sünd söss Soldaten ut Heesdörp fullen oder vermisst, in’n Eersten Weltkrieg dree un in’n Tweten 15^[1].

1936 is in Heesdörp de Lufthauptmunitionsanstalt 5/XI anleggt worrn, in de de Luftmacht Munition lagert hett. De Anlaag hett den Krieg överstahn, ahn dat dor Bummen op afsmeten worrn sünd. 1945 hebbt de Briten dat Lager övernahmen un bet 1955 wiederbedreven. Denn hett de neegrünnte Bundswehr dat Lager von de Briten övernahmen. Dat Lager mit siene Arbeidsplätz hett ok dorto föhrt, dat Heesdörp mit de Tied temlich wussen is.

Heesdörp is 1974 bi de Gemeenreform in Neddersassen mit de Gemeen Bremervöör tohoopleggt worrn.

Dat Wapen wiest op roden Grund dree middelöllerliche Wapen de achter en sülvern Palisaad rutraagt, in de Midd en sülvern Lanz mit gollen Steel, links en Striedex, de na links wiest, mit gollen Steel, un rechts en sülvern Handsass mit gollen Greep, de na baven wiest.

Heesdörp hett binnen de Gemeen Bremervöör en egen Oortsraad mit söven Maten. Oortsbörgermeester is Doris Brandt.

Heesdörp is evangeelsch-luthersch präägt un billt en egen Kaspel.

Toeerst hett dat Dörp to dat Kaspel Mulsen höört. 1759 is Heesdörp denn in dat Kaspel Bevern wesselt. Eerst as de Oort na’n Tweten Weltkrieg temlich wussen is, hett Heesdörp 1960 mit de Fredenskark en egen Kark kregen. De hölten Klockentoorn is 1994 boot worrn.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

En Denkmaal för de Fullenen ut de twee Weltkrieg’ steiht bi’n Karkhoff. En extra Denkmaal för de Fullenen in de Napoleoonschen Kriege, dat 1911 boot worrn is, steiht an de Höövdstraat.

De Freewillige Füürwehr Heesdörp is 1920 grünnt worrn un de Schützenvereen Heesdörp 1936.

De Volksbank Oosterholt-Scharmbeek hett in Heesdörp in de Straat Landwehrdamm 66b en Filiaal.

Heesdörp liggt an de Landsstraat 123, de in’n Noordwesten na Bremervöör un in’n Noordoosten na Kutenhult löppt. De Landsstraat 127 löppt von Heesdörp na Byhusen in’n Süüdoosten un de Landsstraat 107 na Bevern in’n Süüdwesten.

Von 1916 af an hett dat in Heesdörp den Bahnhoff Heesdörp an de Bahnlien Bremerhoben–Stood geven, de vondaag Deel von de Bahnlien Bremerhoben–Buxthu is.

Heesdörp hett mit de Josef-Guggenmos-Grundschool en egen Grundschool.

• Rainer Brandt: Hesedorf bei Bremervörde. Bilder aus einer langen Geschichte. 1985

• Websteed to dat Dörp (hoochdüütsch)

1. ↑ http://www.denkmalprojekt.org/dkm_deutschland/bremervoerde-hesedorf_1812-15_wk1u2_ns.htm
2. ↑ C. H. Jansen: Statistisches Handbuch des Königreichs Hannover. 1824, Sied 270: http://books.google.de/books?id=tG0AAAAAcAAJ&pg=PA270
3. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 132: http://books.google.de/books?id=eOI-AAAAcAAJ&pg=PA132
4. ↑ http://www.gemeindeverzeichnis.de/gem1900/gem1900.htm?hannover/bremervoerde.htm
5. ↑ ^{a b c} http://www.verwaltungsgeschichte.de/bremervoerde.html
6. ↑ Bremervörde und die Ortschaften, archiveert in dat Internet Archive
7. ↑ Bremervörde und die Ortschaften