Radio Occitania

Ràdio Occitània es una ràdio locala associativa, fargada en 1981 a Tolosa, sa tòca es la promocion de la lenga e de la cultura occitana.

S'i realisa e difusa dempuèi aquela data, de programas en occitan cada jorn.

Aqueles programas trachan totas menas de tematicas : economia, politica, espòrt, literatura, cinèma, cultura, istòria, actualitat, sciéncia... botan un lum occitan sul monde d'uèi.

En Miègjorn-Pirenèus, mantunes ràdios associativas prepausan de programas en lenga occitana, dins Arièja, Tarn, Tarn e Garona, Òlt e Avairon. Çaquelà, i a pas que doas ràdios localas que difuson aquela mena d'emissions, a quicòm pròche de 60% de la lor gresilha: son Ràdio País a l'oèst, entre Atlantic e Garona, e Ràdio Occitània dins lo parçan de Tolosa, en Cominges e en Lauragués.

Los programas Occitans e Catalans, son realizats amb coma dralha culturala de botar en dabans lo patrimòni regional europèu, a concuréncia de 10 a 15 oras cada jorn.

S'i difusís tanben de corses d'iniciacion e de perfeccionament a la lenga occitana, aital coma cada jorn, 13 rendètz-vos d'asabers regionals, nacionals, e internacionals en Occitan (amb dos buletins bilingues de miègj-ora francéses-occitans) mostrant aital lo caractér actual e viu de la lenga dels Trobadors.

• (oc) (ca) (en) (fr) Sit de Ràdio Occitània